Reykjavík Tool Library

Bókasafn, nema í stað bóka þá erum við með verkfæri

Framkvæmd

€1.309

131% of €1.000 markmið

Stuðningsaðilar

Líkar við þetta

Tilraunin er í gangi.

Um tilraunina

Vandamálagreining

Deilihagkerfið í Reykjavík

“Því meira sem við deilum, þeim mun meira höfum við” - Leonard Nimoy

Deilihagkerfið virkar þannig að þeir hlutir sem við þurfum einungis að nota í stuttan tíma getum við fengið lánað frá öðrum eða lánað þá hluti sem við eigum til að þeir nýtist betur út líftíma hlutarins. Þessi hugmyndafræði hefur tíðkast í hundruði ára með bækur, en það þekkja allir bókasöfn.

RVKTL (Reykjavík Tool Library - við erum ennþá að leita að uppástungu að góðu íslenskt heiti) virkar einmitt þannig. Borgarbúar geta gerst meðlimir hjá okkur gegn vægu gjaldi, frá 5000 - 8000kr á ári, og fengið þannig aðgang að öllum okkar verkfærum allt að þrjá daga í senn.

Við viljum bjóða borgarbúum að deila hlutum á formlegri máta.

Ábyrgðin á því að eiga hluti.

Öll eigum við einhverja hluti, en lang flestir þeirra teljast til neysluvara. Fyrir ekki mörgum áratugum þá bjó fólk til nánast alla þá muni og verkfæri sem það notaði dags daglega. Það byggði húsin sín, borðbúnað, húsgögn og jafnvel farartæki. Þeim munum var vel viðhaldið þar sem þeir voru dýrmætir. Margir eiga kannski húsgögn eða aðra muni sem voru heimasmíðaðir á árum áður sem hafa tilfinningalegt gildi enn þann dag í dag. Hlutirnir áttu sögu. Það hefur að mörgu leiti breyst.

Við viljum bjóða fólki að deila og viðhalda nútíma hlutum og þekkingu.

Nýsköpun og framkvæmenda hreyfingin.

Orðið Maker Movement er gott og gilt í enskri tungu, en hefur ekki náð að skjóta rótum í Íslensku. Hreyfingin er afsprengi hreyfingar lista og handverksfólks, en orðið Maker snýr meira að því að nýta sér nútíma tækni til að hafa jákvæð og oft listræn áhrif á heimin í kring um sig. Út af mikilli sérhæfingu síðustu áratuga hefur almenn þekking á notkun verkfæra og viðhald á daglegum munum farið dalandi. Við teljum að nýsköpun eigi sér best stað þar sem fólk hefur þekkingu á því hvernig hlutir virka og hvaða verkfæri séu best til framkvæmda.

Við viljum bjóða fólki aðgang að þekkingu, auðlindum og plássi til að skapa fyrir sig sjálft og samfélagið.

Hver erum við?

Við erum Anna Mathos og Hafliði Ásgeirsson. Anna og Hafliði stofnuðu RVKTL í lok sumars 2018. Við höfum fengið gríðarlega góð viðbrögð, en erum ekki ennþá orðin sjálfbær með verkefnið.

Anna kemur upphaflega frá Brasilíu, en flutti til Íslands frá London árið 2016. Hún hafði haft hugmyndina í langan tíma, en tók ákvörðunina um að stofna verkefnið þegar hún fór að sakna þess að hafa aðgang þeim verkfærum sem hún hafði áður í London. Hún tók eftir því að verkfæri á Íslandi eru mjög dýr og erfitt að fá aðgang að ýmiskonar smáverkfærum nema í gegn um óformlegt tengslanet.

Hafliði hefur áður stofnað sambærilegt verkefni sem hét Hakkit. Það var samfélaglegur bílskúr sem hafði auk ýmiskonar verkfæra, sérhæfðari búnað líkt og leiserskera, 3D prentara og CNC fræsi.

Tilraunin í stuttu máli

Reykjavík Tool Library býður meðlimum að fá lánuð ýmiskonar verkfæri í stuttan tíma. Viðskipta líkanið er svipað og hjá bókasöfnum, en þar kemur deilihagkerfið sterkt inn. Við viljum skora neysluhyggjuna á hólm og bjóða fólki tækifæri á því að breyta hugmyndum sínum um eignir og nýtingu auðlinda.

Hvaða vandamál er verið að leysa?

Ríkjandi efnahagsstefna nútímans hefur búið til ófyrirséða kreppu og misskiptingu í nýtingu auðlinda plánetunnar okkar. Okkar heimssýn er að við getum sparað helling á því að deila auðlindum, verkfærum og þekkingu meðal jafningja. Við viljum halda úti samfélagslegu rými þar sem vinnustofur geta átt sér stað og fólk þannig hvatt hvort annað til að finna lausnir við áskorunum framtíðarinnar.

Hver er þinn helsti hvati til að leysa vandamálið?

Auðlindir jarðarinnar eru takmarkaðar og við horfum framhjá því reglulega. Við trúum að samfélög sem deila þekkingu sinni og auðlindum séu best búin fyrir breytt umhverfi jarðarinnar. Á sama tíma verður til nýsköpun þar sem fólk leitast eftir því að leysa þær áskoranir sem það stendur fyrir og sér í umhverfi sínu.

Hvernig hefur þú hugsað þér að leysa vandamálið?

Reykjavík Tool Library er fyrsta skrefið í áttina að því að koma af stað formlegu hringrásar hagkerfi í Reykjavík. Við erum nú þegar með hundruði verkfæra sem meðlimir okkar geta fengið aðgang að í stuttan tíma gegn því að fjárfesta í meðlima korti. Í kjölfarið viljum við búa til bókasafn hluta, en þar er hægt að fá aðgang að hlutum sem falla ekki beint undir skilgreininguna “verkfæri”. Á sama tíma viljum við búa til samfélagslega vinnustofu (e. Makerspace) þar sem flóra af ýmiskonar verkefnum eru unnin sem geta bætt samfélagið og stuðlað að nýsköpun og sjálfshjálp.

Hver eru samfélagslegu áhrifin?

Með því að halda úti stað þar sem fólk getur fengið aðgang að hversdagslegum hlutum þá sparar það pening, auðlindir og geymslu pláss. Það kannast flestir við að eiga fulla geymslu af hlutum sem einungis eru notaðir part úr ári. Við bjóðumst til að geyma þá hluti og um leið veita öðrum aðgang að þeim. Þannig sjáum við um viðhald, geymslu og endurnýjun (ef þörf er á því).

Lágmarksupphæð?

> 1.000.000

Áætlaður tímarammi?

3-6 mánuðir

Helstu áhættur við framkvæmd?

Helstu áhættur tilraunarinnar eru að við fáum ekki nægilega marga meðlimi. Við þurfum um 500 meðlimi á ári til að Tool Library verkefnið okkar sé sjálfbært, en við erum með um 100 í dag eftir að hafa opnað formlega í Ágúst. Við þurfum að finna upp nýjar leiðir til að halda sömu lífsskjörum, og deilihagkerfið getur verið stór partur af því.

Hvað er það helsta sem þig vantar til þess að geta framkvæmt verkefnið þitt?

Við sjáum fyrir okkur að Reykjavíkurborg geti styrkt okkur um fjármagn fyrir starfsmanni í 75% starfi. Við erum komin með húsnæði sem við viljum halda áfram að vera í, en helsta álagið snýr að því að tryggja lágmarks starfsemi.